Thursday, March 10, 2016
گونڈروونڈی سے برسبین
ایک فکر کے
سلسلے کا کالم
کالم شمار دو
سو اکہتر
مارچ چھ،
دو ہزار سولہ
گونڈروونڈی
سے برسبین
ایسا ممکن تھا کہ
ہم برسبین میں جہاں ٹہرے تھے وہاں سے پیدل چلتے چلتے برسبین مرکز شہر پہنچ جائیں
مگر ہم نے کبھی ایسا کیا نہیں۔ برسبین مرکز شہر میں کئی جگہ گاڑی ارزاں نرخ پہ
کھڑی کی جاسکتی تھی اور اس نئے دور میں ہوٹل کے کمرے میں بیٹھ کر پارکنگ کی جگہ
قبل از وقت خریدی جاسکتی تھی اس لیے ہم ہر دفعہ گاڑی ہی سے مرکز شہر پہنچے اور
گاڑی ایک جگہ کھڑی کر کے مرکز شہر کی آوارہ گردی کرتے رہے۔ میلبورن کی طرح برسبین
کا مرکز شہر بھی ایک دریا کے دونوں کناروں پہ دور تک پھیلا ہوا ہے۔ اس دریا کا نام
کیا ہے؟ جی ہاں، دریائے برسبین۔ اگر زمین اس ان سلے کپڑے کی طرح ہے جسے آپ اپنی
مرضی سے تراش خراش کر اپنی پسند کے حساب سے کوئی پہناوا بنا سکتے ہیں، تو یوں
سمجھیے کہ برسبین ایک بہت عمدہ تراش خراش کا نفیس لباس ہے۔ دریا کے دونوں پشتوں پہ
چوڑی چوبی گزرگاہیں ہیں جن پہ کوئی بھاگ رہا ہوتا ہے، کوئی اسکیٹنگ کررہا ہوتا ہے،
اور کوئی یوں ہی چھوٹے قدموں سے چلتا دریا اور شہر کے نظارے آنکھوں میں سمو رہا
ہوتا ہے۔ اور اس گزرگاہ سے آگے اونچی اونچی عمارتیں ہیں جن میں کام کرنے والے جب
اپنی میکانیکی زندگیوں سے تھک جاتے ہوں گے تو ایک نظر دریا کی طرف ضرور کرتے ہوں
گے۔
انگریزوں کے کئی
بہت عمدہ شوق ہیں۔ ان شوقوں میں سے ایک کسی بھی نئی جگہ پہ نباتاتی باغ، بوٹینکل
گارڈن، لگانے کا کام ہے۔ جس طرح چڑیا گھر میں ہر طرح کے جانور جمع کیے جاتے ہیں
تاکہ لوگ دیکھ سکیں کہ یہ زمین انسان کے ساتھ کس کس کے سانجھے میں ہے، اسی طرح
نباتاتی باغ میں بھانت بھانت کے پودے اور درخت جمع کرکے لگائے جاتے ہیں کہ انسان
دیکھ لے کہ زندگی کے کیسے کیسے عمدہ نمونے ممکن ہیں۔ برسبین کا نباتاتی باغ بہت
بڑے رقبے پہ پھیلا ہوا ہے۔
میں برسبین کے
نباتاتی باغ میں پہنچ کر اس کے سحر میں گرفتار ہوگیا۔ وہاں نباتیات کی ساری کتابیں
میرے سامنے کھلی رکھی تھیں اور میں جلدی جلدی ان کی ورق گردانی کر کے ان سے سیکھنا
چاہتا تھا۔ میں سب سے پہلے باغ کے اس حصے کی طرف گیا جہاں براعظم آسٹریلیا کے
مقامی پودے اور درخت تھے۔ میں درختوں کے ساتھ لگی ان کے نام کی تختیاں پڑھ رہا تھا
اور ان سے اس پہلی باضابطہ ملاقات میں ان کے نام یاد رکھنے کی کوشش کررہا تھا۔
جہاں پودے ہوں، اور پانی ہو وہاں پرندے خود بخود آجاتے ہیں۔ اسی وجہ سے اس باغ
میں بہت سے پرندے بھی تھے۔ میں پرندوں اور درختوں کی اس صحبت کے مزے اٹھاتا آگے
سے آگے بڑھ رہا تھا کہ میرے قریب ایک گولف کارٹ آکر رکی۔ اس گاڑی سے باغ کا ایک
کارندہ اترا۔
’’کیا وہ سرمئی
رنگ کی گاڑی تمھاری ہے جو اس جگہ کے قریب ترین پارکنگ لاٹ میں کھڑی ہے۔‘‘ افسر نے
مجھ سے پوچھا۔ میں نے اثبات میں جواب دیا۔
’’باغ بند ہونے
میں صرف تین منٹ رہ گئے ہیں۔ تم فورا اپنی گاڑی باغ سے نکال لو ورنہ تین منٹ کے
بعد باغ کا دروازہ بند ہوجائے گا۔‘‘
یہ پیغام دے کر
افسر اپنی چھوٹی سی گاڑی میں بیٹھ کر وہاں سے روانہ ہوگیا۔ یہاں بھگدڑ مچ گئی۔
بھاگم بھاگ گاڑی تک پہنچا اور اسے چلاتا ہوا ٹھیک وقت پہ باغ کے صدر دروازے سے
نکلنے میں کامیاب ہوگیا۔ نباتاتی باغ بند ہوچکا تھا مگر میرا من اسے چھوڑنے کے لیے
تیار نہ تھا۔ میں نے گاڑی صدر دروازے سے باہر کھڑی کردی۔ باغ کی اصل حدود سے باہر
بھی ایک باغ تھا جو ان پودوں کے لیے مختص تھا جو ایب اورجنی کے لیے اہم تھے اور جن
میں سے کئی پودے اور بوٹے ادویات بنانے کے کام آتے تھے۔ میں اس باغ میں آہستہ
آہستہ چلتا ہوا ایک ایک پودے کو بغور دیکھتا رہا حتی کہ اندھیرا اتنا بڑھ گیا کہ
پودوں کے ساتھ لگی تختیوں کو پڑھنا مشکل ہوگیا۔
میں برسبین کے
نباتاتی باغ سے واپس آتے ہوئے آسٹریلیا میں آنے والے یورپی نسل لوگوں کے ایب
اورجنی سے امتیازی سلوک کے بارے میں سوچتا رہا۔ نوواردوں کو بہت بعد میں یہ خیال
آیا کہ تحریری زبان نہ ہونے کے باوجود، کاشت کاری نہ جاننے کے باوجود، دھات کاری
نہ جاننے کے باوجود، ایب اورجنی کے پاس کچھ نہ کچھ ایسا علم تھا جو نوواردوں کے
پاس نہیں تھا اور اس ایک علم میں ایب اورجنی کے پاس نوواردوں کو سکھانے کے لیے کچھ
تھا۔ اسی باغ میں گھومتے پھرتے مجھے معلوم ہوا تھا کہ ایب اورجنی موسم پہ گہری نظر
رکھتے تھے۔ اگر دور کہیں بادل نظر آئیں اور اندازہ ہو کہ دور نظر آنے والی اس
جگہ بارش ہوئی ہوگی تو ایب اورجنی اس طرف چل دیتے تھے۔ انہیں معلوم تھا کہ جہاں
بارش ہوگی وہاں نئے پودے بھی اگیں گے اور پھر وہ اپنی پسند کے پودے چن کر انہیں
کھا سکیں گے۔ اسی طرح مختلف بیماریوں کے علاج کے لیے بھی ایب اورجنی پودے استعمال
کرتے تھے۔ ایب اورجنی کو حقیر سمجھ کر دھتکارنے کے بہت دہائیوں بعد یہ بات یورپی
نوواردوں کو سمجھ آرہی ہے کہ وہ ایب اورجنی سے علم سیکھ کر ان ہی پودوں کو جدید
ادویا کی تیاری میں استعمال کرسکتے ہیں۔
باغ سے واپس آکر
رات کے کھانے کا انتظام کرنا چاہا تو رنگلا پنجاب ریستوراں کے سائن پہ نظر پڑی۔ ہم
فورا وہاں پہنچ گئے۔ ان کے پاس بکرے کا سالن اچھا معلوم دیا اس لیے وہاں سے یہ
کھانا بندھوا لیا۔ دیسی کیشیر خاتون آسٹریلوی لہجے میں رواں انگریزی بولتی تھیں
مگر ہم نے ان سے ہندی میں بات کی۔ انہوں نے بتایا کہ وہ ریستوراں سات سال پہلے
کھلا تھا۔ پھر انہوں نے ہم سے پوچھا کہ ہمارا تعلق کہاں سے تھا۔ ہم نے کراچی بتایا
اور پھر ان سے وہی سوال کیا۔ خاتون نے کچھ جھجھکتے ہوئے امرت سر جواب دیا۔ ہم نے
ادھر ادھر سے کھانے پینے کی دوسری چیزیں جمع کیں اور ہوٹل پہنچ کر وہاں کھانے کے
کمرے میں خوردونوش کا سارا سامان کھول لیا۔ بکرے کا سالن کھایا تو دل خوش ہوگیا۔
ایک دفعہ پھر امرت سر نے ہمارا دل جیت لیا تھا۔ یاد آیا کہ چند سال پہلے لاہور سے
چلے بھوکے پیاسے امرت سر پہنچے تھے تو ایک چھوٹی سی دکان سے روٹی اور ترکاری لے کر
کھائی تھی اور دونوں چیزوں میں اس قدر مزا تھا کہ امرت سر کے لیے دل سے دعا نکلی
تھی۔
Labels: Aborigines, Amritsar, Australia travelogue, Brisbane Botanical Garden, Desi in Australia, India, Lahore, Medicinal plants, Pakistan, Rangla Punjab Restaurant, Urdu
Thursday, December 31, 2015
وہ مقدس لال چٹان
ایک فکر کے
سلسلے کا کالم
کالم شمار دو
سو اکسٹھ
دسمبر
ستائیس، دو ہزار پندرہ
وہ مقدس لال چٹان
ایلس اسپرنگس ایک سیاحتی مقام ہے۔ یہاں لوگ قدرت کے نظارے دیکھنے آتے ہیں۔
اور یہاں قدرت کا سب سے بڑا نظارہ یہاں کا جغرافیہ ہے۔ یہ وہ جگہ ہے جہاں کروڑوں
سال پہلے سمندر تھا اور آج ہم لال مرکز کی جس زمین پہ چلتے پھرتے ہیں وہ کبھی
گہرے سمندر کی زمین تھی۔ اور اس سے بھی پرانی بات یہ ہے کہ پانی کے بہائو سے آنے
والی مٹی، ٹیلوں کی صورت میں یہاں موجود تھی۔ بہت عرصے بعد یہ ٹیلے قدرتی طاقتوں
کے دبائو سے وہ چٹانیں بن گئے جو آج اس علاقے میں موجود ہیں۔ شاید کبھی یہ ٹیلے
آپس میں جڑے ہوتے ہوں گے مگر پھر ان کے درمیان نرم مٹی کو پانی بہا کر دوسری جگہ
لے گیا۔ اور آج ہمیں لال مرکز کا موجودہ جغرافیہ نظر آتا ہے جس میں حد نظر پھیلا
لال مٹی کا ویرانہ ہے اور اس ویرانے میں دور دور عجیب و غریب ہئیت کی بڑی بڑی
چٹانیں پہاڑیوں کی صورت کھڑی ہیں۔ یہ چٹانیں عام پہاڑوں کی چٹانوں سے اس قدر مختلف
ہیں کہ انہیں دیکھ کر آدمی چونک جاتا ہے۔ آسٹریلیا کے قدیم باشندوں کا ان چٹانوں
کو مقدس خیال کرنا سمجھ میں آتا ہے۔ ان ہی پہاڑیوں میں ایک پہاڑی ایرزراک کہلاتی
ہے۔ ہم اسی مشہور زمانہ چٹان کو دیکھنے کے لیے ایلس اسپرنگس پہنچے تھے۔
ہم نے ایڈی لیڈ سے ایلس اسپرنگس کے لیے جہاز کی جو بکنگ کرائی تھی اس کے ساتھ
ہی ہمیں ایلس اسپرنگس میں ہوٹل ارزاں نرخ پہ مل گیا تھا۔ مگر ایلس اسپرنگس اور
ایرز راک کے درمیان اتنا فاصلہ ہے کہ ہم ایلس اسپرنگس میں ٹہرتے ہوئے دن ہی دن میں
ایرز راک کا چکر لگا کر واپس ایلس اسپرنگس نہیں آسکتے تھے۔ ایرز راک دیکھنے کے لیے وہاں رات بسر کرنا لازم
تھا۔ ایرز راک کے قریب ہی ایک بستی اولورو نام کی ہے۔ دراصل ایرز راک کو آسٹریلیا
کے مقامی باشندے اولورو ہی کہتے ہیں۔ اس بستی میں رات گزارنے کا انتظام کرنے کے
دوران ہی یہ بات سمجھ میں آئی کہ مغربی سیاحتی اداروں نے قابل دید مقامات کو سختی
سے اپنی گرفت میں لے لیا ہے اور ان کی پوری کوشش ہے کہ جس قدر ممکن ہو آپ کی جیب
کو ہلکا کردیں۔ اولورو کو ہی دیکھیں۔ یہ پوری بستی ایک ہی کمپنی کی ملکیت ہے۔ اس
بستی میں خیمہ گاڑنے کی جگہ بھی ہے، اپنی آروی یا ریکریشینل وہیکل کھڑے کرنے کا
میدان بھی، اور انتہائی شاندار ہوٹل بھی۔ یعنی ہر بجٹ کے سیاح سے رقم اینٹھنے کا
مکمل سامان ہے۔ کیونکہ رہائش کی یہ تمام جگہیں ایک ہی کمپنی کی ملکیت ہیں اور دور
دور تک کوئی اور آبادی نہیں ہے اس لیے یہ کمپنی ایرز راک آنے والوں سے منہ مانگے
دام وصول کرتی ہے۔ ہم نے طوعا و کرہا اولورو میں ایک کمرے کی بکنگ کروائی اور ایلس
اسپرنگس سے نکل پڑے۔ ایلس اسپرنگس سے ایرز راک کا سفر پانچ گھنٹے کا تھا۔ اس راستے
میں ہمیں ایرز راک جیسی ایک اور چٹان نظر آئی مگر وہاں رکنے کا کوئی انتظام نہ
تھا۔ اولورو سے کچھ ہی فاصلے پہ ایرز راک ہوائی اڈہ بھی پڑا۔ اگر آپ کے پاس پیسہ
زیادہ ہواور آپ جلدی جلدی دنیا بھر کے خاص خاص سیاحتی مقامات دیکھنا چاہیں تو
ایرز راک دیکھنے کے لیے سیدھا ایرز راک ہوائی اڈے پہنچیں اور چند ہی منٹ کی گاڑی
کی سواری سے ایرز راک پہنچ جائیں۔
ہم اولورو پہنچے تو بستی کے واحد استقبالیے پہ طویل قطار دیکھی۔ ہر بجٹ کے
مسافر کو اس کی مالی استعداد کے حساب سے اس کی رہائش کی طرف روانہ کیا جارہا تھا۔
اس وقت تک سہ پہر ہوچکی تھی۔ ہم سامان کمرے میں دھرنے کے بعد فورا ایرز راک پہنچ
گئے۔ ایرز راک سے کچھ فاصلے پہ ہم نے بہت سی گاڑیوں کو ایک لمبی صف میں کھڑا
دیکھا۔ یہ سیاح ایرز راک پہ ڈوبتے سورج کا نظارہ کرنے کے لیے وہاں موجود تھے۔ بات
ہماری سمجھ میں بھی آئی کہ پہلے کچھ فاصلے سے ایرز راک کو دیکھو اور پھر اندھیرا
ہونے سے پہلے چٹان کا قریب سے معائنہ کرو۔ جیسے جیسے سورج نیچے جاتا گیا، ایرز راک
اپنا رنگ بدلتی گئی۔ پہلے اس کا رنگ چمکیلا لال تھا، پھر اس میں سرمئی رنگ بڑھتا
گیا اور سورج ڈھلنے کے ساتھ پورا پہاڑ گہرے سرمئی رنگ کا نظر آنے لگا۔ اس نظارے
کی ڈھیر ساری تصاویر اتارنے کے بعد ہم فورا پہاڑ تک پہنچ گئے۔ اس وقت تک اندھیرا
گہرا ہونا شروع ہوگیا تھا اور ایرز راک کا پیدل طواف کرنا ممکن نہ تھا۔ ہم نے چٹان
کو جگہ جگہ چھو کر دیکھا کہ آیا وہ واقعی دبائوشدہ مٹی کے ذرات سے بنی تھی۔ ہمیں
ایسا ہی معلوم دیا۔ اعتقادات کے مقابلے میں سائنس کی اچھی بات یہ ہے کہ یہ سوال کا
در کھلا رکھتی ہے۔ آپ بڑے سے بڑے رائج سائنسی نظریے کے متعلق بھی آزادی سے سوال
کرسکتے ہیں۔
اولورو بستی میں ٹہرنے والے ہر قماش کے سیاح رات کے وقت استقبالیے سے متصل
ریستوراں اور اس کے آس پاس جمع ہوگئے تھے۔ وہاں ایک بڑا باورچی خانہ سیاحوں کے
استعمال کے لیے تھا۔ کچھ سیاح خود اپنا کھانا تیار کررہے تھے، کچھ ریستوراں سے
کھانا خرید کر کھا رہے تھے۔ ہم نے ریستوراں کے مینیو پہ نظر کی تو وہاں کینگرو کو
موجود پایا۔ یوں تو کینگرو کا گوشت آسٹریلیا میں خوردونوش کی دکانوں میں بھی نظر
آیا تھا مگر ایرز راک پہ کینگرو کھانے کا اور مزا تھا۔ ہم نے فورا اس گوشت کی
فرمائش کردی۔ اتفاق سے ہمارے حصے میں کینگرو کا آخری لوتھڑا آیا، یعنی ریستوراں
کچھ دیر میں پہنچے ہوتے تو کینگرو نکل چکا ہوتا۔ کینگرو کا وہ گوشت ہمیں کچا دیا
گیا۔ ہمیں اس گوشت کو اپنی مرضی سے بھوننا تھا۔ ہم فورا اس کام میں مصروف ہوگئے۔
گوشت بھوننے کے دوران ہی ہم نے آس پاس کی آوازوں پہ کان دھرے تو بھانت بھانت کی
بولیاں سننے کو ملیں۔ وہاں فرانسیسی بھی بولی جارہی تھی، ہسپانوی بھی، چینی اور
جاپانی بھی۔ یہ مغرب کے سیاحتی اداروں کا کمال ہے کہ وہ کسی بھی ایک مقام کی ایسی
زوردار تشہیرکرتے ہیں کہ دنیا بھر کے لوگوں کو یقین ہوجاتا ہے کہ اگر انہوں نے وہ
مقام نہ دیکھا تو کچھ نہ دیکھا۔ اور پھر یہ سیاحتی ادارے ان ہی یاتریوں سے خوب پیسے
بناتے ہیں۔ ہمارے علاقے یعنی جنوبی ایشیا میں یہ کام پہلے کچھ مختلف انداز سے کیا
جاتا تھا۔ یاتریوں سے پیسے بٹورنے کے لیے عرس اور میلے تھے اور اب بھی ہوتے ہیں۔
کسی گزر جانے والے بزرگ کے ایسے اعلی اوصاف، ایسی محیرالعقل کرامات بیان کرو، اس
مزار کی یوں تزئین کرو کہ لوگ دور دور سے جوق در جوق اس پیر کی قبر کا دیدار کرنے
چلے آئیں۔ لوگ آٗئیں گے تو صدقہ بھی کریں گے، کھانا بھی کھائیں گے، اور خاص خاص
سوغات خرید کر بھی لے جائیں گے۔ چھن چھن
چھن چھن؛ چھن چھن چھن چھن۔
Labels: Aborigines, Alice Springs, Australia, Ayers Rock, Northern Territory, Sacred site, Uluru
Thursday, December 24, 2015
ایلس اسپرنگس
ایک فکر کے
سلسلے کا کالم
کالم شمار دو
سو ساٹھ
دسمبر
اٹھارہ، دو ہزار پندرہ
ایلس اسپرنگس
لال مرکز سحر انگیز ہے۔ آپ ایڈی لیڈ سے ایلس اسپرنگس پہنچیں تو لگتا ہے کہ
آپ کسی دوسرے ملک آگئے ہیں۔ لال مرکز کا تاحد نظر پھیلا سرخ بیاباں آپ کو دعوت
دیتا ہے کہ آپ اس جگہ کو دریافت کرنے کے لیے پیدل نکل جائیں، کسی بھی رخ چل پڑیں،
کچھ کچھ فاصلے پہ رک کر وہاں موجود زمین کو اور دور دور اگی جھاڑیوں کو دیکھیں،
گزرنے والے جانوروں کے پائوں کے نشانات دیکھ کر جانور کی شناخت کرنے کی کوشش کریں،
اور کچھ سستانے کے بعد آگے بڑھ جائیں۔
یورپ سے آنے والے تارکین وطن کی آسٹریلیا آمد سے پہلے ایب اورجنی بہت سادہ
زندگی گزارتے تھے۔ دراصل پرانی دنیا سے ان کا تعلق قریبا چالیس ہزار سال پہلے
منقطع ہوگیا تھا۔ اگر انسان اپنی موجودہ شکل میں افریقہ میں پروان چڑھا تو یہ لوگ
آسٹریلیا کیسے پہنچے؟ شاید آسٹریلیا کے یہ قدیم باشندے اس علاقے سے جو اس وقت
ملائیشیا ہے پیدل چلتے ہوئے آسٹریلیا پہنچے تھے اور ایسا اس لیے ممکن ہو پایا
کیونکہ اس وقت دنیا ایک برفانی دور سے گزر رہی تھی۔ دنیا کا زیادہ تر پانی قطبین
پہ جمع تھا اور سمندر اتھلے ہوگئے تھے۔ اور اسی وجہ سے موجودہ ملائیشیا سے
آسٹریلیا تک ایک زمینی پل موجود تھا۔ شاید اسی پل پہ چلتے ہوئے یہ قدیم لوگ
آسٹریلیا پہنچے۔ ان کے آسٹریلیا پہنچنے کے ہزاروں سال بعد جب برفانی دور ختم
ہوا، سمندروں میں پانی بڑھا، ملائیشیا سے آسٹریلیا کے درمیان کا علاقہ زیرآب
آگیا، اور صرف اونچے مقامات انڈونیشیا کے جزائر کی صورت میں بچ گئے تو یہ لوگ
پرانی دنیا سے کٹ گئے۔ یہ اس وقت کی بات ہے جب انسان شکاری،بٹوریا یا ہنٹر گیدرر
ہوا کرتا تھا۔ ہماری واحد کامیابی یہ تھی کہ ہم نے آگ کو قابو کرلیا تھا۔ انسان
نے نہ تو زراعت ایجاد کی تھی اور نہ ہی جانور پالنے کا فن سیکھا تھا۔ آسٹریلیا
میں ان لوگوں کو کھانے پینے کا کوئی مسئلہ نہ تھا۔ شکار کے لیے بہت سے جانور موجود
تھے اور بٹورنے کے لیے کثیر تعداد میں پھل اور پودے۔ اور اسی وجہ سے قریبا چار سو
سال پہلے جب یورپی مہم جو آسٹریلیا پہنچے تو وہ ان لوگوں کو دیکھ کر بہت حیران
ہوئے۔ کیا کھیت کھلیان، کیا مویشی، کیا پہیہ، کیا سونا اور تانبہ اور کیا رسم
الخط، بظاہر ان لوگوں کے پاس یورپ سے آنے والوں کو دکھانے کے لیے کچھ نہ تھا۔ اور
اسی وجہ سے بہت عرصے تک یورپی، آسٹریلیا کے ان مقامی لوگوں کو انسان خیال نہیں
کرتے تھے بلکہ انہیں انسان نما جانور کے زمرے میں ڈالتے تھے۔
اگر دو ایسے انسانی گروہوں کا سامنا ہو جو زندگی کو بہت مختلف طریقے سے دیکھتے
ہوں تو ان کے درمیان چپقلش ناگزیر ہے۔
یورپی تارکین وطن اور آسٹریلیا کے پرانے باسیوں کے درمیان ایسی چپقلش آج
تک موجود ہے۔
ایب اورجنی ہمیں ایلس اسپرنگس کے مرکز شہر میں خوردونوش اسٹور کے آس پاس بے
مصرف ٹہلتے نظر آتے تھے۔ یوں لگتا تھا کہ جیسے یہ لوگ نئے دور کی اس زندگی سے
سمجھوتہ نہیں کر پائے ہیں جو مغربی دنیا کی دین ہے۔ یورپ سے آنے والا شخص مقامی
آدمی کو بتا رہا ہے کہ صبح صبح اٹھنا ہوتا ہے، پھر سارا دن کام کرنا ہوتا ہے، پھر
دو ہفتے کے بعد تنخواہ ملتی ہے جس سے سارے بل چکانے ہوتے ہیں، اور وہ مقامی شخص
حیران ہے کہ یہ نئے طرز کی زندگی کیسی ہے جس میں زندگی جینے پہ سب سے کم توجہ ہے۔
یہ کیسی زندگی ہے جس میں انسان مستقل کسی مشین کا پرزہ بنا کام کررہا ہے؟ وہ مقامی
شخص سوچتا ہےکہ یورپیوں کے آنے سے پہلے تو ایسا نہ تھا۔ یہ ٹھیک ہے کہ نہ ہمارے
پاس پختہ گھر تھے، نہ سڑکیں تھیں، نہ گاڑیاں تھیں، مگر ہم آرام سے اپنی زندگی تو
جیتے تھے، ہر پل کے خوب مزے تو لوٹتے تھے۔ ہمارے پاس نہ پیسہ تھا اور نہ ہی کسی بل
کی ادائیگی کی ضرورت۔ پانی کا بل، بجلی کا بل، فون کا بل، انٹرنیٹ کا بل، کریڈٹ
کارڈ کی ادائیگی، گاڑی کا خرچہ، کرایہ، مورگیج، ان یورپیوں کے آنے کے بعد ہم کس
جنجال میں پھنس گئے ہیں۔ صبح سے شام کام کرنا، پھر تنخواہ ملنے پہ خریداری کر کے
زندگی گزارنا کتنا عجیب ہے۔ پہلے کتنی آسانی تھی۔ بھوک لگتی تھی تو اس کو مٹانے
کا براہ راست انتظام کرتے تھے۔ اور یہ انتظام کرنا اتنا مشکل نہ تھا۔ جنگل میں جا
کر کھانے کے قابل پھلوں اور پتوں کو جمع کرنا تھا، یا پھر گھات لگا کر کسی جانور
کا شکار کرنا تھا۔ اس کام میں کچھ وقت تو لگتا تھا مگر پھر دن کا بقیہ حصہ زندگی
کو بھرپور طریقے سے جینے میں گزرتا تھا۔ اس زندگی کا وہی سادہ مقصد تھا جو کسی
درخت کا ہوتا ہے، جی داری سے زندگی گزارنا، نسل آگے بڑھانا اور ایک دن مرجانا۔
مجھے ایب اورجنی لوگوں سے ہمدردی ہے اور میں خود بھی اسی طرح سوچتا ہوں کہ
زندگی گزارنا ایک گنجلک معاملہ ہرگز نہیں ہونا چاہیے۔ زندگی میں جس قدر سادگی ہو،
اتنا اچھا ہے۔ مگر کیا کیجیے کہ وقت کی ہوا کسی اور رخ چل رہی ہے۔ نئے دور کا
انسان زندگی سے پریشان ضرور ہے مگر اس کی آسائشیں چھوڑنے کے لیے تیار نہیں۔
یورپ سے آنے والے لوگوں کے پاس جدید ترین ٹیکنالوجی تھی اور مہلک ہتھیار۔ ایب
اورجنی اس جدید ٹیکنالوجی کا مقابلہ نہ کرپائے۔ وہ پسپا ہوگئے۔ جو جگہیں یورپی
نوواردوں نے اپنے رہنے کے لیے چنیں ان جگہوں پہ ایب اورجنی کا صفایا ہوگیا۔ اور
لال مرکز ان لوگوں کا خاص گڑھ بن گیا۔ شکست خوردہ لوگوں کی ایسی آماجگاہ جہاں وہ
دوسروں کے بنائے گئے اصولوں کے حساب سے زندگی تو گزار رہے ہیں مگر بہت زیادہ خوش
نہیں ہیں۔
Labels: Aborigines, Alice Springs, Australia, Red Centre, Uluru
